RATHEE KI LATHEE

:: जय-जय हिन्द के वीर ज़वान ::

जय-जय हिन्द के वीर ज़वान

तेरी सूरत पै जाऊँ कुर्बान

सुथरा तगड़ा छैल-छबीला

कर्द मुच्छैल रौब-रोबीला

सिंह जैसे तेरे नैन चमकीले

फड़-फड़-फड़कैं बाजू जोशीले

खूब-गज़ब की सै तेरी शॉन

जय-जय हिन्द के वीर ज़वान

बहाणां का भाई, तू माँ का प्यारा

बूढ़े बाप की आख्यां का तारा

जिस गैल ब्याहया, वा सूरत प्यारी

गज बण गोरी केसर क्यारी

जन-जन का तू सै भगवान

जय-जय हिन्द के वीर ज़वान

हाथ बन्दूक, जाणो राखै खिलौणा

गोली-बारूदां का बिछा बिछौणा

कट-कट बाजैं बूट तेरे कॉले

चमकैं सैं फीत, पॉटैं सैं चाले

लोह की टोपी पहरै बलवान

जय-जय हिन्द के वीर ज़वान

आया जब दुश्मन भक्षक बण कै

सरहदां पै अड्या तू रक्षक बण कै

वतन पै बख्त बुरा जब आया

हामनै आगै खड्या तू पाया

बैरी का ना छोडै निशान

जय-जय हिन्द के वीर ज़वान